Chamonna Grialetsch - Chüealphorn 3077 msm

Jon Andri Fliri | 15 fin 16 settember 2023

Venderdi davomezdi eschna gnits manats cun ün taxi (grazia Luzia) sül Flüela a Chantsura, ingio cha vain tut la via suot ils peis aint vers la chamonna. Accumpagnià dad ün pêr beschs bondrius eschna rivats güst cuort avant la plövgia illa bella chamonna Grialetsch, renovada e fabrichada oura cumplettamaing be avant duos ons. Davo üna buna tschaina ed üna baderlada in cumpagnia vaina tscherchà la buna not, sperond sün bun'ora pel di davo.

La bunura 'ns ha salüdada cun ün tschêl serain chi impromettaiva ün bel di. Ma plü amunt cha no gnivan e plü ferm cha la tschiera traiva sü da las vals e cuvernaiva lura eir ils pizs. Andri ha propuonü sco ruta la via sur il Augstenhürali (3026 msm) e lur' ün tockin aval e darcheu amunt sül piz principal, il Chüealphorn. Chaminond per part lung sendas, traversond gondas e costas sü vers il Cuolm S-chaletta e davo sü per blaischs stippas ed ün pa main stippas vaina inscuntrà amo üna chavra da capricorn ed ün chamuotsch in cuorsa sü vers la craista dal "Cornet d'avuost". Eir scha la vista süls duos pizs nu d'eira uschè fenomenala aint la tschiera, schi vaina giodü la gita da cumpagnia tant daplü. Dürant la schmuntada gio vers l'Alp Funtauna 's ha muossà eir amo il sulai. Davo üna trottada da l'alp fin oura Susauna e Chapella eschna rivats finalmaing a Cinuos-chel, ingio cha vain pudü giodair illa Veduta il "radler" merità e caffè e tuorta avant co tuornar cul tren darcheu vers Scuol.

Grazcha fich Andri ed Armon per la flotta cumpagnia.

Participants: Andri Poo (guida), Armon à Porta, Jon Andri Fliri