Piz Jeramias

Jon Andri Fliri | 27/28.07.2024

La sonda saira ans vaina chattats individualmaing, ils üns cul velo nan da Ftan, o cun üna gita sül fil da Tuoi obain a la svelta cul auto direct in chamonna pro Denise e seis team per la tschaina.

Il di davo vaina tut la bunura la via sü vers la Fuorcla Vermunt suot ils peis. Davo paca pezza vaina ragiunt il "crap dal bapnos" süsom la prüma costa stipa vers la fuorcla. Il Piz in vista ans ha Not Armon muossà la via sü vers il spi west da nos böt. Oramai nu d'eirna ils unics, siond cha trais oters alpinists rampignaivan fingià sü vers il piz. L'ultim tockin ha quai dovrà amo da sgürar culla sua per rivar finalmaing süsom il piz. Eir sch la vista d'eira per part cuernada cun nüvlas, schi vaina giodü fich l'evenimaint cumünaivel süsom quist piz na propcha cuntschaint.

Davo la schmuntada per part sglischond sur costas da naiv fin bod giosom il spi südwest vaina giodü nossa marenda cun ün pêr razs sulai e, grazcha a l'experienza professiunala da nos manader, dafatta pudü observar amo cuort ün tröp da capricorns, chi mütschivan vi per las costas grippusas suot no. La descensiun finala gio per las costas e gondas stipas in direcziun Plan Furcletta e vers chamonna d'eira lura bod fatta, ingio cha vain pudü giodar la bavronda meritada cun l'acumpognamaint dad ün o tschel schlagherin dals "Gaudibuam".

Grazcha fich Not Armon per la guida e la flotta cumpagnia.

Participants: Not Armon Willy (manader), Anna Neurohr, Christoffel Denoth, Jon Andri Fliri