Fuormaziun da basa per bivacar d’inviern

Domenic Stecher | 30 AVRIGL - 1 MAI

Pervi d’ingünas annunzchas vaina spostà noss'aventüra ün’einvna plü bod, voul dir süls 30 avrigl. Il seguond scopo d’eira la previsiun da l'ora, no vain speculà sün la naiv frais-cha chi vaivan impromiss ils sabis da la meteo. Sonda a bunura intuorn las 10:00h eschan no partits davent da la plazza da parcar P. 2330m cun buschunas in tschercha dad ün bun lö per bivacar. Rivats sü pro’l punct 2641m, vain no decis da fabrichar qua nos bivac. Üna bella planüra suot la paraid dal Piz Radönt, ingio chi as rechattaiva üna jada avant 100 ons amo la leua dal vadret.

Cun metter sü la tenda piglaiva pro eir la sbischa, ün vent magari fraid. Davo avair construi il mür da protecziun e miss noss equipamaint a süt, ans vaina fat pachific in nossa tenda.

Dürant  cha no vain fat marenda squasseva duonna Olla a tuot pudair. I nun es i löntsch fin cha no vaivan üna bella puolvrina da var 10 cm davant nossa foura. Bain protet in noss nouv dachasa, vaina pudü passantar la strasora e discuorer sur da Pinc e Paul.

L’ura muossaiva bod las quatter davomezdi e cun buonder n’haja dad ün cuc our da la fanestra. Uei, sulai, eu nu vez inandret, il sulai as muossa davo il Radüner Rothorn! Subit trar aint las s-charpas da skis e be na perder temp, perquai cha l'ora vess amo üna jada da cupichar. I nun es i löntsch ed ils duos aventüriers d’eiran pronts per ir a savurar la naiv frais-cha.

Sco duos vadels chi vezzan per la prüma jada la prümavaira ans vain no miss in viadi vers üna collina P. 2739 m. Davo avair tut giò las pels, jiiihhpiiihh…., che bels mumaints. La skiada d’eira plüchöntsch cuorta, ma l’aventüra d’eira gronda. No vain pudü far quel di sco prüms la suottascripziun aint la naiv frais-cha. Apaina rivats pro noss bivac haja cumanzà amo üna jada a naiver sco our da sadellas.

Davo üna buna tschaina ans vaina fuats in noss sachs da durmir e passanta üna buna not sainza vent e disturbis. Dumengia a bunura a las quatter ha Jachen Andri stendü seis culöz our da la porta da la tenda e d’eira surprais d’ün tschêl plain stailas. Da culazchun n’haja fat ün bun «English Tea» cun mösina, Jachen Andri ün cafè dubel cun aint Ovosport. A las tschinch e mezza ans vaina tut la via suot ils peis per far la muntada sül Schwarzhorn. Cuort avant las 7:00h vaina pudü dir bütsch al piz.

Alch plü bel co’l alvar dal sulai nu daja, che bellezza. No vain admirà il panorama e giodü la quietezza, avant co chi’s dodiva darcheu ils motors sü dal pass. Davo fat ün per fotografias e mangià la marenda ans vaina fat pront e montà ils skis, .... e dai! Che less eu dir, puolvra da süsom fin giosom 😊.

Il prossem chapitel es il Radüner Rothorn, ed inavant. Il sulai bruscheva fingià in uorden aint per la fatscha. Bütsch al piz per la seguonda ed amo üna jada, puolvra da süsom fin giosom 😊.

Cler, cun üna cuorta fermativa pro noss bivac e l’ultim toc amo cun nossas buschunas fin giò pro la plazza da parcar.

Ingrazchar less eu pro la famiglia Gisep, chi han miss a disposiziun lur tenda chi ans ha tgnü bel chod e süt.

Ün grazcha fichun a Jachen Andri per sias gitas grondiusas e seis nasin fin a reguard l’ora e la naiv.    

Participants: Jachen Andri Gisep, Domenic Stecher