Piz Mingèr 3113 msm

Christina Epting | 24.07.2022

A bunura bod ans vain inscuntra vi Tarasp. Ils participants fits cul velo e quels main sportivs cul velo eletric. OK, nus ans vain laschà güdar ün pa, uschè eschan rivats svelt fin aint in Pradatsch.
Da la davent vaja stip vers il Trigl da Plavna. L’ora es main buna co previss, ma per chaminar amunt, nu fa don la sumbriva d’ün pêr nüvlas. La prüma marenda faina avant chi cumainza la part pretensiusa da la gita. Duos pas inavant ed ün inavò, pel piz es da cumbatter, vaja inavant sü da la grava. Rivats sü la fuorcla, va Jachen-Andri ouravant a rumir la crappa libra per nus. Sainza buschas, perquai cun sezzin e sua daja üna bella rampignada vers il piz. Mincha tegn esa da cleger oura bain, nö mincha crap tegna uschè bain co chi para. Inavant sü d’ün chamin per finir la prüma suada. Davò la seguonda suada mancan be amo ün pêr pass per rivar sül piz. Uossa da eir il sulai amo ün cuc e nus vain üna bella vista aint illa Val S-charl, il Piz Pisoc dad üna e'l Piz Plavna Dadaint cun sias tuorinas da tschella vart. Üna muschna cun aint ün bastun da skis, demuossa chi d’eiran eir fingà oters umans sü sül Piz Mingèr. Il cudesch ha be ün man plain registraziuns daspö il 2003. Aval giana la listessa via, sglischond giòda la grava vaja però plü bain co amunt. Rivats inavò illa Val Plavna, fain ün sigl süls velos e’ns mettain in viadi vers Tarasp. Pro’l bistro al lai, daja lura amo per minchün alch da bun, per finir ün di da bellezza.

Participants: Jachen-Andri Gisep (guida), Justina Derungs, Christoph Keller, Annina Bott, Flurin Marugg, Cristoffel Denoth, Domenic Stecher, Corrado Ghilotti e Christina Epting