Piz Champatsch (Guarda) 2969

Jon Andri Fliri | 10.03.2025

Dumengia bunura las 07:00 ans vaina chattats cun ora da bellezza pro la plazza da parcar suot Guarda. Adonta las temperaturas otas dals ultims dis, vaina lura pudü trar aint ils skis fingià pac sur Guarda e tut la via vers Salön. Las costas sü vers la Muott'Auta deiran stipas ed il ferm sulai ha fat cuorrer las süurs. Ma cul pass regular da nos manader sun tuots rivats bain sü la Muotta. Bod süsom l'ultima spuonda stipa es parti ün ski da Not Armon be gualiv gio per la costa. Grazi'ad Andri, chi'd es be subit parti gio pel ski desertör e Cristoffel, chi ha surtut spontan il timun, eschan rivats bod sainza pardatemp vers las 12 sül piz e böt bramà. Davo cuorta posa e marenda vaina tut la cuorsa aval suot ils skis. Las relaziuns d'eiran fich variadas - da costinas cun per part dafatt'amo naiv da pulvra fin pro naiv bletscha e lomma, chi ha pretais ün sentimaint fin o lura chommas fermas, per rivar a far stortas. Davo quista lunga e bella skiada vaina tuot la cumpagnia amo das-chü giodair üna bavarella sponsurisada da nos nouv commember Hubert illa ustarietta nouva a Gurada.  Grazia fich in nom da tuots e grazia Not Armon per la guida ed a tuots per la flotta cumpagnia.

Participants: Not Armon (manader), Andri, Cristina, Cristoffel, Christoph, Kristin, Lilo, Hubert, Manuela, Jon Andri