Piz Tasna

Fritz Felix | 25 october 2019

Fritz Felix / 12 october 2019 Piz Tasna (ultima gita tenor program da stà 2019)

Partecipants: Jachen Andri Gisep (guida), Alberta e Renzo Kind, Rita e Fritz Felix.

Sco motiv per la gita d’eira indichà: „construir ün nouv homin da crap“. E las indicaziuns dal „dislivel“ (1150 m amunt e 1500 m aval) ans han laschats suppuoner cha no gessan culla pendiculara sülla Motta Naluns, da là sur la Fuorcla Champatsch e gessan sül viadi da retuorn our da la Val Laver a Sent. Ma oha! La saira avant telefona nossa guida Jachen Andri e disch cha no (Rita ed eu) dessan esser 5 avant las 6 pro el a Scuol (tschinch avant las ses!).

No eschan lura its il prüm sü Sent e là vaina amo bavü il cafè pro Alberta e Renzo e davo eschna its cul auto fin in Alp Prà San Flurin. No d’eiran dimena „be“ in tschinch, ma Renzo ha stuvü tour svess l’auto, pervi cha Jachen Andri vaiva amo ün passager zoppà sül sez davo.

Rivats pro l‘Alp Prà San Flurin es lura cumparü il passager zoppà in fuorma d’ün capricorn taglià our da fier (sponsorà da Giacumin Benderer/Geweih-Royal). Quel laiva Jachen Andri dimena portar sül Piz Tasna, e na be quel. Pel cudesch vaiva el construi our d‘assas d’armar (Dreischichtschaltafeln) üna s-chaffetta, o plütöst üna chaista. E che chaista! Massiva e pesanta. In quella vessan lö almain trais exemplars da la prüma Bibla rumantscha da Scuol.

Oramai cha duos da seis cumpogns nu d’eiran gnüts, ha Jachen Andri portà la chargia sulet fin sül piz. Passats sü vers il Vadret da Davo Lais vain no almain pudü far ouravant ün pa senda aint illa naiv per ch’el haja ün zich plü liger. Dal vadret d’üna vouta nun exista dal rest plü bler. Cuort avant co rivar sül spi ans han amo surprais duos giruns chi han fat plüs girs be sur no. L’ultim toc es stat ün zich plü pretensius, ma pro ora da bellezza vaina giodü üna vista stupenda davent dal piz, eir schi nu d’eira chaluors.

La reconstrucziun da l’homin da crap e la „montascha“ dal capricorn han dürà passa ün’ura. Cuntaints dal resultat eschna lura tuornats darcheu vers l’Alp Prà San Flurin.

E là d’eiran güsta duos chatschaders, chi vaivan schluppettà ün capricorn.

Grazcha fich a Jachen Andri per quista gita tuot speciala.