Piz Minschun (3056) - Furcletta - Chamonna Tuoi - Guarda

Jon Andri Fliri | Tura da skis

In dumengia bunura las 08:30 as raduna nossa gruppetta pro la staziun aval da las Pendicularas a Scuol. Dova cha minchün ha seis bigliet muntain cun la pendiculara e davo cun las s-chabelleras fin sü Mot da Ri, ingio cha mettain sü las pels per cumanzar cun la gita. L'ora nu pudess esser megldra cun ün sulai chi splendura a tuot pudair.. Cun quai cha Claudia, plaina d'energia da be subit l'atacha sü per la costa stippa, sto nos manader Not Armon il prüm calmar - " be pachific" ;). Ma listess nu düra lönch e davo paca pezza vaina ragiunt la fuorcla tanter il Piz Oscar ed il Minschun. Cun quai cha la costa vers nord dal Piz Minschun es schnüdada dal vent fin bod süsom, nun ans resta oter co da laschar ils skis gio la fuorcla ed ir a pè sül Piz ed inavo.
La vista süsom es fantastica ed ha vaglü la paina dal sforz implü. Davo üna bella skiada gio la Val Tasna, gio per costas per part fingià cun naiv arsa, faina marenda e giodain il bel chod sulai pro'l "crap da la pausa" gio Urschai. Pro la seguainta muntada sü da la Val d'Urezza fin sü la Furcletta badaina il sulai intensiv ed eir ün païn il sablun da la Sahara, chi para da frenar ils skis sü per las costas.
Rivats süsom la Furcletta ans salüda l'impreschiunant purtret dal Piz Buin - che panorama! Ün'ulteriura cuorta posa da marenda es propcha meritada.
Pro la skiada davo gio vers la chamonna Tuoi as bada fingià ferm l'effet dal sula dal davomezdi e la naiv es per part fingià ter lomma. Davo avair giodü sün la terrassa da la chamonna bain implida ün panasch obain ün schorle cuntinuain la skiada our da la bella Val Tuoi fin bod a Guarda sainza stuvair tra oura ils skis.
Ün grazcha fichun a nos manader Not Armon per la guida ed a tuots per la flotta cumpagnia!

Participants: Not Armon Willy (manader), Margaretha Kneubühler, Claudia Rest, Christoph Keller, Felix Helg, Jon Andri Fliri