Pischahorn - Säss - Isenfürggli - Tschuggen

Jachen Andri | 11.02.2023

Sonda a bunura ans vaina chattats a la staziun a Scuol, respectiv, per quels da Sur Tasna e Val Müstair a Sagliains. Puchadamaing ha Chasper Ans stuvü ir in tschercha da sie buorsa chi’d es restada il di avant in üna butia, Christina e Christoff han machantà il tren. No tuots vaivan grond puchà per els, chi nun han pudü tour part vi da nossa excursiun.

Rivats a Tavo, vain no tut il Pischa-Bus e davo cuort temp d’eiran no davant la staziun da la pendiculara.Pro la staziun da muntogna vaina trat sü las pels e tut la via suot ils peis. Dürant il chaminar ans pudaivan brattar oura sur da nossa paschiun alpina. Sü dal spi accumpagnaiva üna sbischa maglina fin süsom il piz.Davo avair dit «bütsch al piz» e fat la fotografia obligatorica, ans vaina parderts per la skiada. Giò da la paraid da l’ost es i Patrick cun Jachen Andri a dar ün cuc per trar la decisiun finala. Culs ögls dad Argus han els observà las costas da nord/ost sur il Chlein Hafentälli e decis unanim, da far noss stizzis aint in quella bella val verginala. Costas cun puolvra da bellezza, che furtüna, schakaaaa….. 😊. No tuots d’eiran stuts sco’l giat da Flurin, cun quistas relaziuns nu vessan no mai fat quint in quist inviern cun paca naiv. Tuot la gruppa vaiva ün surrier fin davo las uraglias, che aventüra, che surpraisa.

Giò Säss P.1970, pro üna chamonnetta vaina fat la marenda meritada e discuorü sur da nom e pom. A las 11:30 vain no miss in chomma vers il Isenfürggli, duos uras da marcha cun üna culissa da bellezza e quietezza, tuots chi giodaivan il mumaint.

Naa…. che merda…, quist nu po esser vaira - as doda tuot in üna jada aint il silenzi. Schi, che esa capità? A Domenic esa chunc la liadüra. Savond cha’l taxi ans spetta a las 14:00, vain no tschüf il schnervamaint. Davo avair stübgià il cas, ha Domenic e Jachen Andri chattà üna soluziun per tilla reparar provisoricamaing, grazcha al curtè da gialoffa. Tras quai cha la lisüra da la liadüra d’eira bloccada, chaminaiva pouver Domenic sco üna vacha chi vaiva la zoppina. Schi bain ch’el vaiva ün handicap, chaminaiva’l sco üna maschina da cusir, bod da na til tgnair davo. Per furtüna es quist discapit capità a Domenic e na ad inchün oter, el es cuntschaint sco hom düritsch e perseverant. No tuots speraivan be, cha quel ski tegna vi da la s-charpa fin giò’l Tschuggen.

Traversà la costa dal Isentällispitz, eschan no rivats sül cuolm Isenfürggli. Speditiv ans vain fat pront per l’ultima skiada - bain cler, eir quista jada nu das-chaiva mancar la fotografia. Cun quai cha no vaivan l’ura süls chalchogns, deiva be amo üna, ils trais pleds magics - dai, dai, dai ! Eir la costa dal Tschuggenberg d’eira grondiusa, naiv da buna qualità.

Claudia cumbataiva cunter sias gramfchas, ma valurusa sco ch’ella es, mors fin gisom, bravo! Proppi be ün ultim toccin sur il Tschuggen, là gniva planet s-chars cun la naiv, ma eir quai vain no superà sco buns alpinists.

Punctualmaing, sül bat da l’ura, eschan no rivats giò pro la barierra, il taxi fingià pront cun portas avertas. Cun ün pajadun aint per la liadüra, vaina sbarrazzà a Domenic da sia trappla, «ATK da merda» ha’l dit e miss ils skis aint il portader da skis vi dal vierchel da la valischera.

A la staziun Davos Dorf, pro’l büfett, vaina fat l'ultima marenda e spettà a nos tren chi ans manaiva darcheu inavo in patria.

Chara cumpagnia, bel esa stat! Ün grazcha fich a tuotTas partecipantAs pel flot accumpognamaint e fin bainbod, a bun ans verer 👋.

Participants: Jachen Andri Gisep & Patrick Müller (manaders), Domenic Stecher, Claudia Rest, Aita Dermont, Laura Fuchs, Silvano Stecher